திருச்செந்தூரில் கந்த சஷ்டி விழா துவங்கியது!

திருச்செந்துார் முருகன் கோவிலில் 'கந்த சஷ்டி' திருவிழா யாக சாலை பூஜையுடன் இன்று கோலாகலமாக துவங்குகிறது.

அறுபடை வீடுகளில் 2வது படை வீடான திருச்செந்தூர் சுப்பிரமணிய சுவாமி கோயிலில் நடைபெறும் முக்கிய விழாக்களில் ஒன்றான கந்த சஷ்டி திருவிழா இன்று (அக்.31ஆம் தேதி) துவங்கியது.

திருச்செந்துார் முருகன் கோவிலில், இன்று அதிகாலை காலை கோயில் நடை திறக்கப்பட்டு, சுவாமிக்கு விஸ்வரூப தீபாராதனையும், உதயமார்த்தாண்ட அபிஷேகமும் நடந்தது. பின்னர், காலை 7:00 மணிக்கு, சுவாமி ஜெயந்திநாதர், வள்ளி, தெய்வானையுடன் யாக சாலையில் எழுந்தருளினார். இதைத் தொடர்ந்து சிறப்பு பூஜைகள், உச்சிகால அபிஷேகம், மூலவருக்கு மகா தீபாராதனை, பின் யாகசாலையில் மகா தீபாராதனை ஆகியவை சிறப்பாக நடந்தது. மாலை 3.30 மணிக்கு மேல் சாயரட்சை தீபாராதனை மற்றும் கால பூஜைகள் நடக்கிறது. இந்த திருவிழாவின் முக்கிய நிகழ்ச்சியான சூரம்சம்ஹாரம் வருகிற நவ. 5ஆம் தேதி நடக்கிறது.

இதையொட்டி திருச்செந்தூர் கடற்கரையில் லட்சக்கணக்கான பக்தர் புடைசூழ யாக சாலை பூஜையுடன் கந்த சஷ்டி திருவிழா கோலாகலமாக துவங்கியது. பக்தர்கள் கடலில் புனித நீராடி 6 நாட்கள் விரதத்தை துவங்கினர்.

தமிழகத்தின் பல்வேறு முருக பெருமான் திருகோவில்களிலும் கந்த சஷ்டி திருவிழா சிறப்பு பூஜை, புனஸ்காரங்களுடன் துவங்கின.