எம்புள்ளைய கொன்னுட்டாங்க - ராம்குமாரின் தந்தை கதறல்

ராம் குமார் தற்கொலை செய்து கொண்ட விவரம் அவருடைய பெற்றோருக்கு போலீசார் தெரிவிக்கவிலை என்று கூறப்படுகிறது. ஊடகங்கள் வாயிலாகத் தான் தெரிந்து கொண்டனர் என்று கூறப்படுகிறது.

சுவாதி படுகொலை வழக்கில் சந்தேகத்தின் பேரில் கைது செய்யப்பட்ட ராகுமார் (26) சிறையில் திட்டமிட்டு கொலை செய்யப்பட்டுள்ளதாக ராம்குமார் தந்தை பரமசிவம் குற்றம்சாட்டியுள்ளார்.

சென்னை நுங்கம்பாக்கம் ரயில் நிலையத்தில் சூளைமேட்டையைச் சேர்ந்த மென்பொருள் பொறியாளர் சுவாதி, கடந்த ஜூன் 24 ல் வெட்டிக் கொலை செய்யப்பட்டார். இதுதொடர்பாக திருநெல்வேலி மாவட்டம் செங்கோட்டை அருகே உள்ள டி.மீனாட்சிபுரத்தைச் சேர்ந்த ராம்குமாரை ஜூலை 1-இல் போலீஸார் கைதுசெய்து சென்னையில் புழல் சிறையில் அடைத்தனர்.

ராம்குமார் மீது அடுத்தவாரம் குற்றப்பத்திரிக்கை தாக்கல் செய்ய இருந்த நிலையில் இன்று புழல் சிறையில் மின்சாரம் பாய்ந்துகொண்டிருந்த கம்பியை கடித்து தற்கொலைக்கு முயன்ற ராம்குமார், ராயப்பேட்டை அரசு மருத்துவமனையில் சிகிச்சைக்காக அனுமதிக்கப்பட்ட நிலையில் சிகிச்சை பலனின்றி உயரிழந்தார்.

இதையடுத்து ராம்குமாரின் தந்தை பரமசிவம் செய்தியாளர்களிடம் கூறுகையில், சிறையில் ராம்குமாருக்கு உடல்நல குறைவு ஏற்பட்டுள்ளதால் மருத்துமனையில் அனுமதிக்கப்பட்டுள்ளதாகவே எங்களுக்கு தகவல் தெரிவிக்கப்பட்டது.

இந்நிலையில், திடீரென ராம்குமார் தற்கொலை முயற்சி செய்து உயிரிழந்துவிட்டதாக தகவல்கள் வெளியாகி உள்ளன. இது திட்டமிட்டு சிறையில் நடத்தப்பட்ட கொலை என்று குற்றம்சாட்டியுள்ளார் பரமசிவம்.

ராம்குமாரின் உடல் ராயப்பேட்டை மருத்துவமனையில் வைக்கப்பட்டுள்ளது.

ராம்குமாரின் பெற்றோரிடம் கையெழுத்து பெற்ற பின்னரே பிரேத பரிசோதனை நடைபெறும் என்று கூறப்படுகிறது.

ராம்குமாரின் தற்கொலை தமிழகம் முழுவதும் பயங்கர அதிர்ச்சியை ஏற்படுத்தியுள்ளது.