சமத்துவ மக்கள் கட்சி தலைவர் சரத்குமாரின் காரில் இருந்து 9 லட்சம் ரூபாய் பறிமுதல்

தூத்துக்குடி அருகே சமத்துவ மக்கள் கட்சியின் தலைவர் சரத்குமாரின் காரில் இருந்து 9 லட்சம் ரூபாய் பணம் பறிமுதல் செய்யப்பட்டது. தூத்துக்குடி மாவட்டம் திருச்செந்தூர் அடுத்த நல்லூரில் தேர்தல் பறக்கும் படை அலுவலர் வள்ளிக்கண்ணு தலைமையிலான குழுவினர் அதிகாலை 4 மணியளவில் வாகன சோதனையில் ஈடுபட்டிருந்தனர். அப்போது அவ்வழியாக வந்த சமத்துவ மக்கள் கட்சி தலைவர் சரத்குமாரின் காரை அதிகாரிகள் சோதனையிட்டனர். அதில் 9 லட்சம் ரூபாய் பணம் இருப்பது கண்டுபிடிக்கப்பட்டது.

இதற்கான உரிய ஆவணம் எதுவும் காட்டப்படாததால் அப்பணத்தை பறிமுதல் செய்த அதிகாரிகள், அதை திருச்செந்தூர் அரசு கருவூலத்தில் ஒப்படைத்தனர். உரிய ஆவணத்தை சமர்பித்தால் அப்பணம் திருப்பி வழங்கப்படும் என்று செய்தியாளர்களிடம் பறக்கும் படை அலுவலர் வள்ளிக்கண்ணு தெரிவித்தார்.
 

செய்தி :: சாஹிப்.