வெடித்து சிதறிய சாம்சங் ஃபோன்...!

அமெரிக்காவில் கேலக்ஸி நோட் 7 ஸ்மார்ட்ஃபோன் வெடித்துச் சிதறியதாகக் கூறி, வாடிக்கையாளர் ஒருவர் சாம்சங் நிறுவனம் மீது வழக்கு தொடர்ந்துள்ளார்.

தென்கொரியாவை சேர்ந்த சாம்சங் நிறுவனம், சமீபத்தில் கேலக்ஸி நோட் 7 ஸ்மார்ட்ஃபோனை சர்வதேச சந்தையில் அறிமுகம் செய்தது. எனினும், இதில் தரமான பேட்டரி இல்லாத காரணத்தால், சார்ஜ் செய்யும்போது, வெடித்துச் சிதறுவதாக, புகார் எழுந்தது. இதை ஒப்புக் கொண்ட சாம்சங் நிறுவனம், சர்வதேச சந்தையில் விநியோகித்த கேலக்ஸி நோட் 7 ஸ்மார்ட்ஃபோன்களை திரும்பப் பெற தொடங்கியுள்ளது.

இந்நிலையில், அமெரிக்காவின் ஃபுளோரிடா மாகாணத்தைச் சேர்ந்த ஜோனாதன் என்பவர் சாம்சங் நிறுவனம் மீது வழக்கு தொடர்ந்துள்ளார். அதில், இந்த ஃபோனை தனது கால்சட்டையில் வைத்திருந்தபோது, திடீரென வெடித்துச் சிதறியதாகவும், இதனால் காலில் காயம் அடைந்ததாகவும் கூறியுள்ளார். இதுதொடர்பாக, சாம்சங் நிறுவனம் உரிய இழப்பீடு வழங்க வேண்டும் என்றும் அவர் வலியுறுத்தியுள்ளார்.