கோவையில் வன்முறை பரவாமல் தடுக்கவேண்டும் - திருமாவளவன்

கோவையில் இந்து முன்னணி பொறுப்பாளர் படுகொலை செய்யப்பட்டதை அடுத்து, அங்கு வன்முறை சம்பவங்கள் நிகழ்ந்து வருகின்றன. இதனை தடுக்க உடனடியாக தமிழக அரசு நடவடிக்கை எடுக்க வேண்டும் என்று விடுதலை சிறுத்தைகள் கட்சி தலைவர் திருமாவளவன் வலியுறுத்தியுள்ளார்.

இதுதொடர்பாக அவர் இன்று வெளியிட்டுள்ள அறிக்கையில்,

கோவையில் இந்து முன்னணி பொறுப்பாளர் சசிகுமார் 22-4-2016 அன்று படுகொலை செய்யப்பட்டுள்ளார். இதனை விடுதலைச் சிறுத்தைகள் கட்சி மிக வன்மையாகக் கண்டிக்கிறது. தொடர்புடைய குற்றவாளிகளை உடனடியாக கைதுசெய்ய வேண்டுமெனவும் வலியுறுத்துகிறது.

அதேவேளையில், இதனை ஒரு சாக்காக வைத்துக்கொண்டு கோவை நகரத்தில் சமூகவிரோத சக்திகள் வன்முறைவெறியாட்டத்தில் இறங்கியிருப்பது அதிர்ச்சி அளிக்கிறது. ஒரு நாள் முழுவதும் பட்டப் பகலில், கும்பல் கும்பலாகத் திரண்டு, தனியார் சொத்துக்களுக்கும் பொதுச் சொத்துக்களுக்கும் பெருமளவில் சேதத்தை ஏற்படுத்தும் வகையில் வன்முறையில் ஈடுபட்டுள்ளனர். கல்வீச்சு, தீவைப்பு போன்ற வெறியாட்டத்தில் இறங்கியுள்ளனர்.

இதில் காவல்துறையினரின் வண்டிகளும் சேதமடைந்துள்ளன. வெளிப்படையாக அரங்கேறிய இந்த வன்முறையைக் கட்டுப்படுத்தவோ, வன்முறையாளர்களை விரட்டியடிக்கவோ காவல்துறை முயற்சிக்கவில்லை என்பது வேதனை அளிக்கிறது. பலமணி நேரம் காவல்துறை அமைதிகாத்தது ஏனென்று விளங்கவில்லை. வன்முறையில் ஈடுபட்டவர்கள் இசுலாமியர்களின் உடமைகளைக் குறிவைத்து தாக்கியதாகவும், இதன்மூலம் மீண்டும் இந்து - இசுலாமியர் மோதலுக்கு வழிவகுத்திட வன்முறையாளர்கள் முயற்சிப்பதாகவும் தெரிகிறது. ஏற்கனவே, கோவை மாநகரம் இத்தகைய வன்முறைகளால் கடுமையாகப் பாதிக்கப்பட்டது என்பதை அனைவரும் அறிவோம்.

இந்நிலையில், காவல்துறை மிகவும் விழிப்பாக இருந்திருக்கவேண்டும். சசிக்குமார் கொலை செய்யப்பட்ட நிலையில் பொது மக்களுக்கு உரிய பாதுகாப்பு நடவடிக்கையை மேற்கொண்டிருக்க வேண்டும். ஆனால், வன்முறையாளர்களின் நடவடிக்கைகளை காவல்துறை வேடிக்கைப் பார்த்தது மிகவும் அதிர்ச்சியாகவுள்ளது. எனினும், மேலும் வன்முறை பரவாமலிருக்கும் வகையில் தமிழக அரசு உடனடியாக உரிய நடவடிக்கைகளை மேற்கொள்ளவேண்டுமென விடுதலைச் சிறுத்தைகள் வேண்டுகோள் விடுக்கிறது.

இவ்வாறு தனது அறிக்கையில் விடுதலை சிறுத்தைகள் கட்சி தலைவர் திருமாவளவன் குறிப்பிட்டுள்ளார்.