எட்டு பேரையும் சுட்டுத்தள்ளுங்கள் - புதிய ஆடியோவால் சர்ச்சை

சிறையில் இருந்து தப்பித்ததாக கூறி சிமி அமைப்பை சேர்ந்த எட்டுபேரையும் சுட்டு தள்ளுங்கள் என்று போலீஸ் அதிகாரி ஒருவர் உத்தரவிடும் ஆடியோவால் புதிய சர்ச்சை கிளம்பியுள்ளது.

கடந்த அக்டோபர் 31ம் தேதி மத்திய பிரதேசத்திலுள்ள போபால் சிறையில் பாதுகாப்பு பணியில் ஈடுபட்டிருந்த காவலரை ஸ்டீல் பிளேட்டால் அறுத்துக் கொன்றுவிட்டு, பெட்ஷீட் உதவியால் சுவர் மீது ஏறி 8 சிமி பயங்கரவாதிகள் என்று கருதப்பட்டவர்கள் தப்பிச் சென்றனர்.

இதனை தொடர்ந்து மத்திய பிரதேச மாநிலம் முழுவதும் தப்பியோடிய அவர்களை தீவிரமாக தேடினார்கள். இந்நிலையில் அவர்கள் தப்பியோடிய அன்றே போபால் நகரின் புறநகர் பகுதியில் அமைந்துள்ள எயின்கேடி என்ற கிராமத்தில் உள்ள ஒரு வீட்டில் தங்கிருந்ததை கண்டறிந்த காவல்துறையினர்,அவர்களை என்கவுண்டர் மூலம் சுட்டுக் கொன்றனர்.

இதுதொடர்பாக, போலீசார் தரப்பில் எடுக்கப்பட்ட வீடியோ ஒன்றும் உடனடியாக வெளியிடப்பட்டது. என்கவுண்டர் சமயத்தில் எடுக்கப்பட்ட வீடியோவில் உண்மைத் தன்மை இல்லை என்றும், சித்தரிக்கப்பட்டு எடுக்கப்பட்டது என்றும் பல்வேறு தரப்பில் இருந்து கண்டனங்கள் எழுந்தது.

இந்தநிலையில் தப்பியோடியவர்களை கைது செய்யும் பொறுப்பில் இருந்த போலீசாரிடம், உயர் அதிகாரி ஒருவர் அந்த எட்டு பேரையும் சுட்டு தள்ளுங்கள் என்று செல்போனில் உத்தரவு போட்டுள்ளார். உயர் அதிகாரியும் போலீசும் பேசிய இந்த என்கவுண்டர் தொடர்பான ஆடியோ தற்போது வெளியாகி பெரும் சர்ச்சையை கிளம்பியுள்ளது.